Gwasanaeth Tân Ac Achub Canolbarth a Gorllewin Cymru

Mae’r adran hon yn eich galluogi i ganfod mwy am y broses ddethol, o adeg eich cais cychwynnol trwodd i’r adeg pan fod y Gwasanaeth yn cysylltu â chanolwyr ac yn cynnal archwiliadau iechyd, os fyddwch yn cwblhau pob agwedd arall yn llwyddiannus.

Mae yna bump cam i’r broses ddethol.

Cais cychwynnol
Profion ysgrifenedig
Profion corfforol
Cyflogaeth
Sgrinio Cyn Cyflogi e.e. Tystlythyrau, Archwiliadau Meddygol a Sgrinio Cyffuriau ac Alcohol

Cais Cychwynnol

Bydd gofyn i chi ddarparu manylion personol, megis eich enw, cyfeiriad, manylion cyswllt, cymwysterau, trwydded yrru ac unrhyw swyddi blaenorol gyda’r gwasanaeth tân ayb.

Yn ogystal, bydd gofyn i ymgeiswyr y System Dyletswydd Wrth Gefn i ddarparu manylion ynghylch y cyflenwad y byddant yn medru’i ddarparu h.y. nifer o oriau’r wythnos, ac yn ystod pa rannau o bob dydd. Bydd yr wybodaeth yma’n cael ei ystyried yn erbyn gofynion yr orsaf dan sylw ar yr adeg honno, a fydd yn penderfynu p’un ai bydd y cais yn symud ymlaen ymhellach ai peidio.

Bydd gofyn i chi hefyd, ar y cam gwneud cais, i gwblhau datganiad o unrhyw gollfarnau troseddol ‘heb ddarfod’ sydd gennych (yn unol â’r Ddeddf Adsefydlu Tramgwyddwyr). Os oes gennych unrhyw gollfarnau ‘heb ddarfod’, rydym yn annhebygol o ystyried eich cais. Gellir gweld Deddf Adsefydlu Tramgwyddwyr 1974 ar wefan yr OPSI, trwy glicio ar y ddolen ganlynol.

Gellir dod o hyd i gyngor cyffredinol ar ddatgelu collfarnau ar y wefan Cyngor ar Yrfaoedd, trwy glicio ar yddolen hon.

Bydd angen i chi gwblhau’r adran Asesu Rhinweddau a Phriodweddau Personol(PQA) o’r ffurflen gais, sef: Gweithio gyda Phobl Eraill, Ymrwymiad i Amrywiaeth ac Uniondeb, Ymrwymiad i Ddatblygu, Hyder a Gwydnwch, Ymrwymiad i Ragoriaeth a Bod yn Agored i Newid. Ar gyfer pob PQA, mae gofyn i chi ddisgrifio gweithgaredd sy’n arddangos eich profiad yn y maes ar ei orau, a’ch mewnbwn personol i’r sefyllfa dan sylw.

Paratowyd y ffurflen gais i asesu’r rhinweddau a’r priodweddau sy’n ofynnol i fod yn Ddiffoddwr Tân effeithiol. Mae’n rhan bwysig o’r broses ddethol, ac mae’n asesu’r nodweddion sy’n ymwneud yn uniongyrchol â rôl Diffoddwr Tân.

Profion Ysgrifenedig

Byddwch yn cael eich gwahodd i gyfranogi mewn cyfres o brofion ysgrifenedig, a baratowyd i fod yn berthnasol iawn i waith diffoddwyr tân. Mae’r rhain yn cymryd tua thair awr i’w cwblhau.

Mae’r profion yma’n cynnwys profion ysgrifenedig a seicometrig, sy’n ffurfio’r Holiadur Diffoddwyr Tân Cenedlaethol a thri phrawf Gallu Diffoddwyr Tân Cenedlaethol, sy’n cynnwys y meysydd canlynol:

Y prawf gweithio gyda rhifau

Prawf wedi’i amseru yw hwn, sy’n cynnwys 32 o gwestiynau ac sy’n para 45 munud. Mae’n rhaid bod Diffoddwr Tân yn medru cwblhau cyfrifiadau rhifiadol sylfaenol, er enghraifft dehongli medryddion neu cyfrif hyd y bibell sydd ei hangen. Mae’r prawf yn cynnwys nifer o senarios sy’n cyflwyno gwybodaeth rifiadol mewn amryw ffurf, o graffiau i fedryddion. Bydd gofyn i chi ateb cwestiynau amlddewis ar bob senario.
Y prawf deall gwybodaeth

Prawf wedi’i amseru yw hwn, sy’n cynnwys 25 o gwestiynau ac sy’n para 30 munud. Mae’r prawf hwn yn asesu eich gallu i ddarllen a deall gwybodaeth ysgrifenedig o’r math yr ydych yn debygol o ddod ar ei draws fel Diffoddwr Tân. Byddwch yn cael eich cyflwyno â nifer o senarios, bydd nifer o gwestiynau amlddewis yn dilyn, a dylech ddefnyddio’r wybodaeth a roddir yn y senario i ateb y cwestiynau sy’n dilyn.
Y prawf ymwybyddiaeth sefyllfaol a datrys problemau

Prawf wedi’i amseru yw hwn, sy’n cynnwys 30 o gwestiynau ac sy’n para 35 munud. Bwriad y prawf yw edrych ar eich gallu i sicrhau eich diogelwch chi ac eraill, a’ch gallu i ddefnyddio gwybodaeth i ddatrys problemau. Byddwch yn cael eich cyflwyno â nifer o senarios, a bydd gofyn i chi ddewis eich ymateb mwyaf tebygol o blith cyfres o atebion.

Bydd y Llyfrynnau Paratoi ac Ymarfer, yn rhoi gwell syniad i chi o beth i’w ddisgwyl, a sut i baratoi eich hun ar gyfer cam y prawf ysgrifenedig yn y broses.

Profion Corfforol

Paratowyd y profion corfforol i asesu eich ffitrwydd, cryfder, stamina, cydweithrediad, deheurwydd a’ch gallu i ddeall a chymhwyso gwybodaeth. Yn ogystal, mae’r profion yn edrych ar eich gallu i weithio ar uchder ac mewn lleoedd cyfyng a thywyll. Mae pob un o’r profion yn berthnasol i rôl diffoddwr tân.

Y prawf mudo cleifion

Paratowyd y prawf hwn i asesu cryfder a chydweithrediad rhannau uchaf ac isaf y corff. O fewn terfyn amser, mae’r ymgeiswyr yn llusgo dymi 55 cilogram tuag yn ôl o amgylch cwrs 30m, ar gyflymdra cerdded, gan ddefnyddio dolen gario sy’n sownd i’r dymi. Byddwch yn cael eich tywys o gwmpas y cwrs gan aseswr cymwys.
Y prawf lleoedd cyfyng

Paratowyd y prawf hwn i asesu hyder, ystwythder a stamina. Gan wisgo set offer anadlu a mwgwd am eich wyneb, byddwch yn mynd hanner ffordd trwy dwnnel ymlusgo, a byddwch yn medru gweld. Unwaith y byddwch y tu mewn, bydd y twnnel yn mynd yn dywyll, a bydd yn rhaid i chi ddychwelyd i’r dechrau, gan gyflawni tasgau ar y ffordd, fel y cyfarwyddir. Gwneir hyn i gyd o fewn terfyn amser.
Y prawf cydosod offer

Mae’r prawf hwn yn asesu medrusrwydd corfforol. O fewn terfyn amser, bydd yr ymgeiswyr yn cydosod ac yn dadosod nifer o gydrannau i wneud darn o offer, gan ddilyn cyfres o ddiagramau. Byddwch yn cael gweld gwers ddangos o flaen llaw.
Cario Offer

Paratowyd y prawf hwn i asesu ffitrwydd erobig, stamina, cryfder a chydweithrediad rhannau uchaf ac isaf y corff. O fewn terfyn amser, byddwch yn cario amryw o eitemau o offer y gwasanaeth tân ac achub i fyny ac i lawr y cwrs, rhwng dau gôn a osodwyd â 25m rhyngddynt. Byddwch yn cael gwers ddangos ar y technegau codi cywir, a byddwch yn cael cyfle i ymarfer codi’r eitemau o flaen llaw.
Dringo Ysgolion

Mae’r prawf hwn yn asesu eich hyder a’ch cydweithrediad ar uchder. O fewn terfyn amser, byddwch yn dringo ysgol 13.5m ac yn cyflawni nifer o dasgau. Byddwch yn cael cyfle i ymarfer ar y llawr cyn dringo dwy ran o dair o’r ffordd i fyny, gan gyflawni’r tasgau fel y cyfarwyddir, cyn dod i lawr yn briodol. Gwisgir harnais diogelwch llawn yn ystod y prawf hwn.
Prawf Efelychydd Lifft Ysgol

Mae’r prawf hwn yn asesu cryfder a chydweithrediad rhannau uchaf ac isaf y corff. O fewn terfyn amser, byddwch yn codi bar efelychydd lifft ysgol i’r uchder gofynnol, gyda 15 cilogram o bwysedd ar grud yr efelychydd, ac yna byddwch yn ei ollwng yn ddiogel o dan reolaeth.

Mae manylion pellach am y profion yma’n gynwysedig yn y Nodyn Cyfarwyddyd ar y Profion Corfforol.

Mae canllawiau cyffredinol ar ymarfer corff a mwy o wybodaeth am y profion corfforol ar gael yn: Canllawiau Grŵp Llywio Firefit ar Hyfforddiant i Baratoi’n Gorfforol ar gyfer y Profion Dethol Diffoddwyr Tân Cenedlaethol..

Cyfweliad Rhinweddau A Phriodweddau Personol (PQA)

Os cewch eich gwahodd i gyfweliad, fe fydd yn para tuag awr. Bydd dau berson yn cynnal y broses gyfweld, gydag un yn holi cwestiynau am eich profiadau a’r llall yn cymryd nodiadau llawn, i sicrhau bod cofnod yn cael ei gadw o’r holl enghreifftiau a roddir. I gychwyn, bydd eich cyfwelwyr yn cyflwyno eu hunain ac yn cyflwyno fformat y cyfweliad i chi.

Fel ar eich ffurflen gais, bydd eich cyfwelwyr yn ymchwilio i’ch profiadau a sut yr ydych wedi defnyddio’r Rhinweddau a Phriodweddau Personol (PQA) perthnasol sy’n cael eu hasesu. Mae’r meysydd yma’n cynnwys:

Gweithio gyda Phobl Eraill

Mae’r maes hwn yn ymwneud â gweithio’n effeithiol gydag amryw o bobl, p’un ai eu bod yn eich tîm neu yn y gymuned.
Ymrwymiad i Ragoriaeth

Mae’r maes hwn yn canolbwyntio ar fabwysiadu ymagwedd gydwybodol a blaenweithgar at waith, a chyflawni a chynnal safonau rhagorol.
Ymrwymiad i Ddatblygu

Mae’r maes hwn yn ymwneud â bod â’r gallu a’r ymrwymiad i ddatblygu eich hun a phobl eraill.
Ymrwymiad i Amrywiaeth ac Uniondeb

Mae’r maes hwn yn canolbwyntio ar ddeall a pharchu gwahaniaethau pobl eraill a thrin pobl yn deg ac yn foesegol.
Cyfathrebu’n Effeithiol

Mae’r maes hwn yn edrych ar ba mor effeithiol y medrwch gyfleu gwybodaeth ar lafar, cael pobl i’ch deall a sut yr ydych chi’n deall gwybodaeth.

Nod y cyfweliad yw casglu enghreifftiau o bryd a sut yr ydych wedi defnyddio sgiliau sy’n bwysig i ddarpar ddiffoddwyr tân.

Mae gwybodaeth bellach am y broses gyfweld ar gael yn y Llyfryn Ymarfer Cyfweliadau Diffoddwyr Tân.

Sgrinio Cyn Cyflogi

Asesiad Meddygol

Os fyddwch yn llwyddiannus yn y profion ysgrifenedig, y profion corfforol a’r cyfweliad, bydd yn ofynnol i chi gwblhau asesiad meddygol gyda'n darparwr Iechyd Galwedigaethol.

Ynghyd ag archwiliad cyffredinol, byddwch yn cael y profion canlynol:

Golwg (yn cynnwys lliw)
Clyw
Gweithrediad yr ysgyfaint
Ffitrwydd Cardio (prawf stepio, safon leiaf o 42 VO2)
Cryfder gafael
Prawf Cydweithrediad a Hyblygrwydd
Prawf Troeth

Mae’n rhaid i bob ymgeisydd sy’n gwneud cais i Wasanaeth Tân ac Achub Canolbarth a Gorllewin Cymru i fod yn Ddiffoddwr Tân i gael prawf golwg gydag optegydd cymwys ar eu traul eu hunain. Mae’n rhaid i’r ymgeisydd a’r Optegydd i gwblhau Ffurflen Asesu Optometrig a’i dychwelyd i’r Adran Adnoddau Dynol.

Mae’r safonau golwg fel a ganlyn:-

6/9 gyda’r ddau lygad yn unigol - heb gymorth.
N12 ar 30cm gyda’r ddau lygad ar agor – heb gymorth.
Cyrch gweld normal yn y ddau lygad (fel y penderfynwyd gan dechnegau cyfwynebu).
Dim hanes o nosddallineb (dallineb yn y nos) neu glefyd llygadol sy’n debygol o waethygu ac achosi i safonau’r golwg i ddirywio.
Lefel briodol o olwg lliw (dim mwy na dau gamgymeriad adnabod yn y set Ishihara fel arfer, ond bydd ymgeiswyr sy’n methu’r safonau yma’n cael cyfle i gael profion golwg lliw mwy penodol, a fydd yn cael eu trefnu gan y Meddyg Galwedigaethol sy’n cynghori’r Gwasanaeth.

Bydd gofyn i chi ddatgan unrhyw anabledd neu amhariad ar eich ffurflen gais, a hefyd ar holiadur iechyd a fydd yn cael ei hanfon atoch cyn yr asesiad meddygol. Anfonir yr holiadur iechyd yn uniongyrchol i iechyd galwedigaethol, yn gyfrinachol, a bydd yn ein cynorthwyo wrth ystyried eich ffitrwydd i gyflawni rôl diffoddwr tân.

Gosodir y safonau meddygol gan yr Adran Cymunedau a Llywodraeth Leol (CLG), fodd bynnag, cyfrifoldeb pob gwasanaeth tân ac achub yw gwneud penderfyniad ynghylch ffitrwydd a gallu ar gyfer y rôl. Gyda hyn mewn cof, nid ydym yn eithrio unigolyn sydd ag anabledd, er enghraifft asma neu glefyd y siwgr, yn awtomatig, ond buasem yn ystyried pob cais ar ei rinweddau ei hun. Mewn achosion o’r fath, cynhelir yr archwiliad meddygol yn dilyn y profion ysgrifenedig, cyn y profion corfforol a’r cyfweliad, am resymau’n ymwneud ag ymarferoldeb ac i ystyried ymhellach addasiadau rhesymol ymarferol a gallu.

Sgrinio Cyffuriau ac Alcohol

Bydd angen i chi gyfranogi mewn, a phasio, Prawf Sgrinio Cyffuriau ac Alcohol, a fydd yn cael ei gynnal gan ein darparwyr profion sgrinio.

Tystlythyrau

Byddwn yn anfon am dystlythyrau, os byddwch yn llwyddiannus yn y cyfweliad, a bydd angen i chi roi manylion eich cyflogwr presennol a blaenorol, er mwyn i ni fedru caffael tystlythyrau.

I gael mwy o wybodaeth ac i ganfod mwy am y Gwasanaeth Tân ac Achub, mae’n bosib bydd y gwefannau canlynol o ddefnydd i chi: http://extraordinary.direct.gov.uk