06.01.2026

Gwasanaeth Tân ac Achub Canolbarth a Gorllewin Cymru yn Cefnogi Confoi sy’n Mynd â Chymorth i Ddiffoddwyr Tân Wcráin

Ddechrau Rhagfyr, fe wnaeth Gwasanaeth Tân ac Achub Canolbarth a Gorllewin Cymru gefnogi’r nawfed confoi, a drefnwyd gan FIRE AID, i fynd â chymorth brys i Ddiffoddwyr Tân Wcráin, sy'n wynebu heriau gweithredol eithafol.

Gan Steffan John

Categorïau



Ddechrau Rhagfyr, fe wnaeth Gwasanaeth Tân ac Achub Canolbarth a Gorllewin Cymru (GTACGC) gefnogi’r nawfed confoi, a drefnwyd gan FIRE AID, i fynd â chymorth brys i Ddiffoddwyr Tân Wcráin, sy'n wynebu heriau gweithredol eithafol.

Mae FIRE AID yn elusen sy’n cael ei redeg gan wirfoddolwyr, a sefydlwyd yn 2012. Ei diben yw bod yn ganolbwynt ar gyfer rhannu gwybodaeth ac adnoddau er mwyn cryfhau ymdrechion ymateb brys ledled y byd.



Hyd yn hyn, mae confois FIRE AID wedi cyflenwi mwy na 130 o gerbydau tân ac achub a thros 200,000 o ddarnau o offer hanfodol i Wcráin, er mwyn cynorthwyo Diffoddwyr Tân sydd dan fygythiad cyson gan ymosodiadau drôn.  Ers i Rwsia ymosod ar yr Wcráin yn 2022, mae dros 100 o Ddiffoddwyr Tân wedi’u lladd, ac mae Gwasanaeth Brys y Wladwriaeth wedi dioddef colledion sylweddol, gan gynnwys dros 1,800 o gerbydau tân ac achub a thros 400 o orsafoedd tân.  Er gwaethaf y caledi hyn, mae diffoddwyr tân Wcráin wedi achub dros 5,500 o ddinasyddion, gan ddangos dewrder a gwytnwch rhyfeddol.


Y Rheolwr Gwylfa, Rob Kershaw, oedd yn cynrychioli GTACGC ar y confoi, ac ef yw cynrychiolydd FIRE AID y Gwasanaeth.  Dyma ddywedodd Rob am fod yn rhan o’r confoi:

“Mae wedi bod yn fraint cael cynrychioli GTACGC ar y confoi, ac rwy’n ddiolchgar iawn o gefnogaeth y Gwasanaeth. Mae hyn wedi sicrhau ein bod yn gallu cynnig cymorth hollbwysig i’r diffoddwyr sydd ar y rheng flaen yn Wcráin.

Pan oeddwn i yn y confoi, fe wnes i gwrdd â chriw Diffodd Tân o Wcráin a oedd wedi colli eu peiriant dair wythnos ynghynt mewn ymosodiad wedi’i dargedu.  Cerbyd o ddyddiau’r Undeb Sofietaidd oedd hwnnw, ac roedden nhw wedi’i gynnal a’i gadw am flynyddoedd lawer. Felly roedd cael peiriant modern yn ei le yn dipyn o newid, ac yn welliant sylweddol yr mawr ei angen.   Tra bues i’n treulio amser gyda'r criw i'w helpu i ddod i arfer â'r peiriant newydd, cefais i glywed am eu profiadau o ymateb i ddigwyddiadau dan amodau peryglus. Roedd hyn drawiadol a theimladwy ac yn ein hatgoffa o'r heriau maen nhw'n eu hwynebu bob dydd."



Roedd pob Gwasanaeth Tân ac Achub a gymerodd ran yn cyfrifo’u hanghenion lleol eu hunain ac yn blaenoriaethu diogelwch eu cymunedau cyn cyfrannu unrhyw offer oedd ganddyn nhw dros ben.

Fel rhan o'u hymrwymiad i gefnogi Diffoddwyr Tân Wcráin, mae FIRE AID wedi lansio Brave Minds, menter newydd sy'n cynnig gwasanaeth iechyd meddwl wedi'i deilwra, bedair awr ar hugain y dydd.  Nod y gwasanaeth yw helpu'r rhai sydd dan bwysau seicolegol enfawr wrth ymateb i argyfyngau mewn rhyfel.


Erthygl Flaenorol Erthygl Nesaf

Y Newyddion Diweddaraf

GWELD POB NEWYDDION