Cydraddoldeb ac Amrywiaeth

Ar hyn o bryd, mae gan y Gwasanaeth nifer bach o rwydweithiau/fforymau cyflogeion ar waith, ac mae eu prif swyddogaethau fel a ganlyn:

• ​Hyrwyddo materion ar gyfer cyflogeion;
• Cyfrannu at agenda cynhwysiant ac amrywiaeth y sefydliad;
• Rhoi cyngor ar ddatblygu polisïau;
• Gwella'r amgylchedd gwaith ar gyfer cyflogeion.

Lansiodd y Gwasanaeth ei Fforwm Anabledd cyntaf ym mis Gorffennaf 2015, ac mae'r aelodaeth wedi tyfu'n gyson ers hynny. Mae'r fforwm yn agored i staff ag anableddau a'r rheiny sydd â diddordeb mewn materion anabledd a chynhwysiant. Hyd yma, mae'r materion sydd wedi'u codi wedi amrywio o wella hygyrchedd ein hadeiladau a'r wybodaeth a ddarparwn, i'r ffordd orau o helpu ein cydweithwyr yn y meysydd gweithredol ac ym maes Diogelwch Cymunedol i ddarparu'r gwasanaeth gorau posibl i'r rheiny yn ein cymunedau sydd â mathau gwahanol o anableddau gweledol ac anweledol.

Mae'r fforwm yn cwrdd unwaith bob chwarter, a darperir diweddariad o bob cyfarfod i Dîm Arweinyddiaeth Weithredol y Gwasanaeth.

Er mai dim ond yn gynnar yn 2017 y cafodd y Rhwydwaith Lesbiaidd, Hoyw, Deurywiol a Thraws/Rhwydwaith Cynghreiriaid Lesbiaidd, Hoyw, Deurywiol a Thraws ei ffurfio, mae gan y Grŵp eisoes syniadau am feysydd polisi a darparu gwasanaethau yr hoffai ddylanwadu arnynt. Mae'r Grŵp yn cwrdd yn chwarterol, ac mae'n agored i gyflogeion sy'n eu hystyried eu hunain yn Lesbiaidd, Hoyw, Deurywiol a Thraws, yn ogystal â chynghreiriaid.

Mae Deddf Cydraddoldeb 2010 yn diogelu pobl, yn gyfreithiol, rhag gwahaniaethu yn y gweithle ac yng nghymdeithas yn gyffredinol.

Fe wnaeth y Ddeddf unigol hon ddisodli’r amrywiol gyfreithiau gwrth-wahaniaethu blaenorol, gan wneud y gyfraith yn haws ei deall a chryfhau’r amddiffyniad mewn rhai sefyllfaoedd.  Mae’n traethu’r gwahanol ffyrdd y mae’n anghyfreithlon i drin rhywun.

Os am wybodaeth bellach am y Ddeddf ewch i'r dudalen Saesneg Equality Act 2010 Guidance ar safle we'r llywodraeth.

Mae Asesiadau o'r Effaith ar Gydraddoldeb yn ein helpu i wella'r gwasanaethau rydym yn eu darparu yn ein cymunedau, yn ogystal â bywydau gwaith ein staff. Maent yn ein galluogi i asesu effaith ein polisïau, mentrau, penderfyniadau a gwasanaethau, gan ein helpu i ddileu unrhyw effeithiau andwyol y gallai'r polisïau, mentrau, penderfyniadau a gwasanaethau hynny eu cael er ein cyflogeion neu'r cymunedau rydym yn eu gwasanaethu, neu i liniaru'r effeithiau andwyol hyn.

Os oes gennych unrhyw ymholiadau neu os oes angen unrhyw wybodaeth arnoch ynglŷn ag Asesiadau Effaith Cydraddoldeb y gwasanaeth, cysylltwch â ni drwy:

Ebost adnoddaudynol@tancgc.gov.uk
Ffôn  01267 226839

Fel cyflogwr yn y sector cyhoeddus gyda thros 250 o staff, mae’n ofynnol yn ôl y gyfraith i Wasanaeth Tân ac Achub Canolbarth a Gorllewin Cymru lunio Adroddiad ar y Bwlch Cyflog Rhwng y Rhywiau o dan Reoliadau 2017 (Gwybodaeth Bwlch Cyflog rhwng y Rhywiau) Deddf Cydraddoldeb 2010.

Mae llunio adroddiad ar y bwlch cyflog rhwng y rhywiau yn ofyniad gwahanol i gynnal archwiliad cyflog cyfartal – nid yw’n adolygiad o gyflog cyfartal ar gyfer gwaith cyfartal, yn hytrach mae’n nodi’r gwahaniaeth rhwng enillion cyfartalog (cymedrol a chanolrifol) gweithwyr gwrywaidd a benywaidd, cymharu cyfraddau tâl fesul awr ac unrhyw fonysau y gall staff eu derbyn, gan geisio nodi unrhyw anghydbwysedd.

Bydd y canlyniadau’n cael eu defnyddio i asesu lefelau o gydraddoldeb rhwng y rhywiau yn ein gweithle; cydbwysedd gweithwyr gwrywaidd a benywaidd ar wahanol lefelau, a’r strategaethau rydym yn bwriadu eu defnyddio i ymdrin ag unrhyw wahaniaethau sydd gennym.

• Lawrlwythwch ein Hadroddiad Bwlch Cyflog Rhywiol 2024
• Lawrlwythwch ein Hadroddiad Bwlch Cyflog Rhywiol 2023
• Lawrlwythwch ein Hadroddiad Bwlch Cyflog Rhywiol 2022 (PDF, 628Kb)
• Lawrlwythwch ein Hadroddiad Bwlch Cyflog Rhywiol 2021 (PDF, 1.4Mb)
• Lawrlwythwch ein Hadroddiad Bwlch Cyflog Rhywiol 2020 (PDF, 700Kb)
• Lawrlwythwch ein Hadroddiad Bwlch Cyflog Rhywiol 2018 (PDF, 650Kb)