Ym mis Hydref, cymerodd cynrychiolwyr o Wasanaeth Tân ac Achub Canolbarth a Gorllewin Cymru (GTACGC) sy'n rhan o Chwilio ac Achub Rhyngwladol y DU (UK-ISAR) ran mewn Ymarferiad Hyfforddi Gwres a Lleithder yn Singapore.
Mynychodd y Rheolwr Gorsaf Rebecca Davies a'r Rheolwr Gwylfa Stephen Fuge y cwrs yng nghyfleuster Llu Amddiffyn Sifil Singapore o 9 i 12 Hydref. Roedd y rhaglen hyfforddi yn cynnwys pob agwedd graidd ar weithrediadau ISAR, gan gynnwys gorchymyn a rheoli, cynnal a bylchu, gweithio ar uchder, mynediad linell, a thynnu rhai sydd wedi’u hanafu’n rhydd a gofalu amdanynt.
Cynhaliwyd senarios hyfforddi ar draws dau safle ar wahân, a oedd wedi’u cynllunio nid yn unig er mwyn rhoi profiad i’r criwiau o'r heriau o weithio mewn gwres a lleithder eithafol, ond hefyd i efelychu'r sefyllfaoedd cymhleth, go iawn y mae timau UK-ISAR yn aml yn eu hwynebu pan mewn lleoliadau rhyngwladol.
Mae Tîm UK-ISAR ar alwad 24 awr y dydd, 365 diwrnod y flwyddyn i ymateb i ddigwyddiadau dyngarol, damweiniau neu drychinebau unrhyw le yn y byd, i ddarparu gallu chwilio ac achub a chefnogi ymdrechion dyngarol. Mae'r tîm wedi bod yn gweithredu ers dros 20 mlynedd ac mae ganddo aelodau o 13 o Wasanaethau Tân ac Achub y DU, sydd wedi cyflawni cyrchoedd chwilio, achub a chymorth ledled y byd yn llwyddiannus.
UK-ISAR yw ymateb swyddogol Llywodraeth y DU i drychinebau rhyngwladol, wedi'i ariannu a'i gefnogi gan FCDO (Swyddfa Dramor y Gymanwlad a Datblygu).