Criwiau yn Cymryd Rhan Mewn Ymarferiad Hyfforddi yn CWM Environmental

Dydd Llun, Ebrill 29, aeth criwiau Caerfyrddin, Cydweli, Llandysul a Llandeilo i ymarferiad hyfforddi chwilio ac achub gydag offer anadlu yn CWM Environmental, Nantycaws.

Roedd yn rhaid i’r criwiau wynebu adeilad llawn mwg a oedd yn cynnwys swyddfeydd a gweithdy gydag adroddiadau bod nifer o bobl angen eu hachub.  Mae ymarferiadau hyfforddi fel hyn yn efelychu sefyllfaoedd go iawn ac yn caniatáu i ddiffoddwyr tân fagu hyder yn eu gallu i wisgo a defnyddio offer anadlu. 

Mae gwisgo offer anadlu yn ychwanegu pwysau a gall gyfyngu ar y gallu i symud, gan wneud ymarferiadau hyfforddi yn gorfforol feichus.  Mae'r ymarferiadau hyn yn helpu diffoddwyr tân i ddatblygu eu dygnwch, nerth ac ystwythder, sy'n hanfodol i allu cyflawni eu dyletswyddau'n effeithiol. Roedd cyfle i’r criwiau hefyd wella eu gwaith tîm a'u cydlyniad gan fod angen cyfathrebu ac ymddiriedaeth, sy'n hanfodol i weithrediadau llwyddiannus yn ystod argyfyngau.  Mae offer anadlu yn gyfarpar sy'n caniatáu i berson anadlu mewn amgylchedd gelyniaethus lle byddai anadlu fel arall yn amhosibl, yn niweidiol neu'n beryglus.

Wrth siarad am yr ymarferiad hyfforddi, dywedodd y Rheolwr Gwylfa Iwan Jones:

Allech chi fod yn Ddiffoddwr Tân Ar Alwad?

Mae Caerfyrddin*, Cydweli, Llandysul a Llandeilo yn Orsafoedd Tân Ar Alwad, sy’n golygu bod eu diffoddwyr tân yn cael eu hysbysu am alwad frys trwy ddyfais alw bersonol, y maen nhw’n ei chario gyda nhw pan fyddant ar ddyletswydd.

Mae Gwasanaeth Tân ac Achub Canolbarth a Gorllewin Cymru ar hyn o bryd yn recriwtio Diffoddwyr Tân Ar Alwad ym mhob un o’n Gorsafoedd Tân Ar Alwad.

Mae rôl Diffoddwr Tân Ar Alwad yn darparu llawer o gyfleoedd ar gyfer datblygiad personol a phroffesiynol, trwy hyfforddiant, gwaith tîm, arweinyddiaeth a datrys problemau. Mae Diffoddwyr Tân Ar Alwad yn derbyn tâl am eu gwasanaethau, gan gynnwys ffioedd cadw a thaliadau galw allan, gan ychwanegu at eu hincwm o gyflogaeth arall.

Dysgwch fwy am sut i fod yn Ddiffoddwr Tân Ar Alwad yma.

*Mae gan Orsaf Dân Caerfyrddin system criwio yn ystod y dydd ac ar alwad.