26.07.2024

Diffoddwyr Tân Amser Cyflawn Diweddaraf Gwasanaeth Tân ac Achub Canolbarth a Gorllewin Cymru

Ddydd Iau, Gorffennaf 25ain, cynhaliwyd Seremoni Raddio a Gorymdaith i nodi Cwblhau’r Cwrs Hyfforddi gan Wasanaeth Tân ac Achub Canolbarth a Gorllewin Cymru ar gyfer y garfan ddiweddaraf o Ddiffoddwyr Tân Amser Cyflawn.

Gan Steffan John

Categorïau



Ddydd Iau, Gorffennaf 25ain, cynhaliwyd Seremoni Raddio a Gorymdaith i nodi Cwblhau’r Cwrs Hyfforddi gan Wasanaeth Tân ac Achub Canolbarth a Gorllewin Cymru (GTACGC) ar gyfer y garfan ddiweddaraf o Ddiffoddwyr Tân Amser Cyflawn.

Roedd y digwyddiad, a gynhaliwyd yng Nghanolfan Hyfforddi Iarll y Coed y Gwasanaeth, yn gyfle i ddathlu ac i fyfyrio ar lwyddiannau anhygoel y 12 unigolyn - sy’n cael eu hadnabod gyda’i gilydd fel Carfan 02/24 - sydd wedi cwblhau eu cwrs hyfforddi Diffoddwr Tân Amser Cyflawn 14 wythnos o hyd yn ddiweddar, a hynny yng nghwmni eu teuluoedd a’u ffrindiau.

Yn dilyn proses recriwtio helaeth lle cyflawnwyd amrywiaeth o heriau fel rhan o broses ddethol drylwyr, dechreuodd Carfan 02/24 ar eu cwrs preswyl 14 wythnos ar Ebrill 17eg.  Ers hynny, mae pob un ohonynt wedi datblygu'r sgiliau a'r galluoedd cychwynnol sydd eu hangen i gyflawni eu rolau newydd fel Diffoddwyr Tân Amser Cyflawn. 

Maen nhw wedi cael eu hyfforddi ar sut i ymateb i amrywiaeth o argyfyngau mewn amrywiaeth o sefyllfaoedd, fel achub o ddŵr, gweithio ar uchder, diogelu'r amgylchedd a mwy.  Maen nhw hefyd wedi gweithio’n agos gyda Thimau Diogelwch Cymunedol a Diogelwch Tân i Fusnesau’r Gwasanaeth i ddatblygu eu gwybodaeth a’u sgiliau ymhellach ym maes atal tanau, gan eu galluogi i integreiddio’n llwyr yn ein Gorsafoedd Tân Cymunedol.

Roedd y Seremoni’n cynnwys Gorymdaith y Recriwtiaid, pan ymunodd Gosgordd Faneri Seremonïol y Gwasanaeth â nhw, ac Archwiliad o’r Recriwtiaid gan y Prif Swyddog Tân Roger Thomas, Cadeirydd Awdurdod Tân ac Achub Canolbarth a Gorllewin Cymru, y Cynghorydd Gwynfor Thomas a’r Rheolwr Gwylfa ac Hyfforddwr, Phil O’Shea.  Yna cynhaliwyd nifer o Arddangosfeydd Iard Ymarfer i ddangos y sgiliau ymateb brys y mae pob aelod o'r Garfan wedi'u datblygu yn ystod eu hyfforddiant, ac yn dilyn hynny cyflwynwyd y Tystysgrifau a’r Gwobrau*.

Yn ogystal â theulu a ffrindiau pob recriwt, roedd y Prif Swyddog Tân Thomas, y Dirprwy Brif Swyddog Tân Iwan Cray, Cadeirydd yr Awdurdod Tân y Cynghorydd Gwynfor Thomas, Dirprwy Gadeirydd yr Awdurdod Tân y Cynghorydd John Davies, ynghyd â sawl aelod o Dîm Arweinyddiaeth Weithredol y Gwasanaeth, hefyd yn bresennol.







Wrth gychwyn y seremoni’n swyddogol, dywedodd y Prif Swyddog Tân Thomas:

“Mae heddiw’n ddiwrnod i ddathlu’r llwyddiannau rhyfeddol a wnaed gan y 12 unigolyn eithriadol hyn sydd wedi cael 14 wythnos o hyfforddiant trwyadl ac mae’n nodi pwynt arwyddocaol yn eu gyrfaoedd fel Diffoddwyr Tân Amser Cyflawn. Fel rhan annatod o’r seilwaith ymateb brys yng Nghymru, mae GTACGC yn enghraifft o broffesiynoldeb, parodrwydd ac ymroddiad diwyro i ddiogelwch y cyhoedd ac rydych chi bellach yn rhan hanfodol o’r gwaith hwn. Hoffwn ddiolch yn fawr i'r Adran Cyflenwi Hyfforddiant sydd wedi gweithio'n ddiflino i gyflwyno cwrs hyfforddi o'r radd flaenaf i'n recriwtiaid newydd. Heb y sgiliau, yr wybodaeth arbenigol a’r ymroddiad, ni fyddai hyn yn bosibl.”

Roger Thomas - Prif Swyddog Tân


Cyn bo hir bydd pob un sydd wedi graddio yn dechrau eu gyrfaoedd fel Diffoddwyr Tân Amser Cyflawn yn eu Gorsaf Dân ddynodedig.  Mae pawb yn GTACGC yn eu llongyfarch ac yn dymuno gyrfa hir a lwyddiannus i bob un ohonynt.

*Gwobrau a gyflwynwyd yn y Seremoni Raddio

Tystysgrif Cwrs Hyfforddi Diffoddwyr Tân Amser Cyflawn

Cyflwynodd y Prif Swyddog Tân Thomas dystysgrif wedi’i fframio i bob Diffoddwr Tân Amser Cyflawn i gydnabod eu bod wedi cwblhau’r Cwrs Hyfforddi Diffoddwyr Tân Amser Cyflawn 14 wythnos yn llwyddiannus.



Cyflwyno Gwobr Arbennig Ffitrwydd Corfforol

Mae’r wobr hon yn cael ei dewis gan Dîm Ffitrwydd y Gwasanaeth ac yn cael ei chyflwyno i’r recriwt sydd wedi gwthio’i hun i’r eithaf yn gyson ac sydd wedi ymdrechu i wneud ei orau glas bob tro. 

O garfan 02/24, cyflwynwyd y wobr hon i’r Diffoddwr Tân Daniel Hart gan y Prif Swyddog Tân Thomas.



Gwobr Recriwt y Recriwtiaid

Mae’r sawl sy’n derbyn y wobr hon yn cael ei ddewis gan y recriwtiaid eraill ar y cwrs.   Mae’n cael ei rhoi i'r recriwt sydd wedi ymdrechu orau yn bersonol ac wrth helpu eu cyd-recriwtiaid.  Mae hon yn wobr nodedig gan ei bod yn tynnu sylw at unigolyn sy'n perfformio'n arbennig o dda.

Cyflwynwyd y wobr i’r Diffoddwr Tân Greg Owen gan Gadeirydd yr Awdurdod Tân, y Cynghorydd Gwynfor Thomas.



Gwobr y Recriwt sydd wedi Perfformio Orau

Mae’r Fwyell Arian yn cael ei rhoi i'r recriwt sy'n perfformio orau ar y cwrs ac mae’r sawl sy’n derbyn y wobr hon yn cael ei ddewis gan eu prif hyfforddwyr.  Bydd y recriwt sy'n perfformio orau wedi perfformio ar lefel uchel yn gyson ym mhob tasg drwy gydol y cwrs.  Mae gallu ymarferol, aseiniadau ysgrifenedig, canlyniadau arholiadau, arweinyddiaeth a gweithio fel rhan o dîm i gyd yn cael eu hystyried wrth ddewis y recriwt sy’n perfformio orau.

Cyflwynwyd y wobr i’r Diffoddwr Tân Can Tenbeloglu gan gan y Prif Swyddog Tân Thomas.




Ymunwch â Ni

Ar hyn o bryd, mae Gwasanaeth Tân ac Achub Canolbarth a Gorllewin Cymru’n recriwtio ar gyfer Diffoddwyr Tân Ar Alwad ym MHOB UN o’n Gorsafoedd Tân Ar Alwad.

Mwy o wybodaeth
Erthygl Flaenorol Erthygl Nesaf

Y Newyddion Diweddaraf

GWELD POB NEWYDDION