Diffoddwyr Tân yn Cymryd Rhan mewn Ymarfer Hyfforddi Cwympiad Awyren

Yn hwyr ym mis Hydref, cymerodd personél Gwasanaeth Tân ac Achub Canolbarth a Gorllewin Cymru (GTACGC) sy’n rhan o Dîm Chwilio ac Achub Trefol Cymru (USAR) ran mewn ymarfer hyfforddi amlasiantaeth ar raddfa fawr a oedd yn efelychu damwain awyren ym Maes Awyr Southampton.

Ymunodd Diffoddwyr Tân GTACGC â chriwiau Gwasanaeth Tân ac Achub Hampshire ac Ynys Wyth (GTAHYW), yn ogystal ag ymatebwyr brys o Wasanaeth Ambiwlans De Canolog, Gwasanaeth Tân Maes Awyr Southampton, Heddlu Hampshire ac Ynys Wyth ac Uned Rheoli Digwyddiadau GTAHYW.  Bu’r ymarfer yn efelychu awyren a oedd wedi cwympo ar faes parcio, gan arwain at nifer o gleifion a cherbydau yn cael eu heffeithio ac felly digwyddiad heriol i bob asiantaeth.

Fel rhan o’r ymarfer, roedd aelodau’r Tîm USAR yn rhan o’r gwaith o ddiogelu safle’r ddamwain a chwilio am gleifion.  Yn cynnwys personél o GTACGC a Gwasanaeth Tân ac Achub De Cymru, a gyda chefnogaeth personél Cydnerthedd Cenedlaethol Cymru, mae Tîm USAR Cymru yn gallu ymateb i gefnogi criwiau gweithredol mewn amrywiaeth o ddigwyddiadau.

Dywedodd Cydlynydd ISAR a Rheolwr Gorsaf Dân Eastleigh, Paul Lawler:

“Bu’r digwyddiad hwn yn her i ymateb ein Diffoddwyr Tân a chadlywyddion i ddigwyddiad mawr yn un o safleoedd critigol ein hardal.

Mae maint yr ymarfer hwn yn tynnu sylw at ba mor gymhleth fyddai digwyddiad o’r natur hon, felly mae’r hyfforddiant hwn wedi darparu profiad hynod werthfawr i’n timau, gan brofi nid yn unig ein sgiliau diffodd tân ac achub, ond hefyd ein sgiliau cyd weithio gyda phartneriaid golau glas.”