26.07.2024

#DwinNabodRhywun - ydych chi?

Ydych chi'n adnabod rhywun a fyddai'n elwa o wiriad Diogelwch yn y Cartref am ddim?

Yn gynharach yr wythnos hon, fe gyflwynodd Gwasanaeth Tân ac Achub Canolbarth a Gorllewin Cymru ymgyrch newydd #DwinNabodRhywun yn Sioe Frenhinol Cymru.

Gan Rachel Kestin



Ydych chi'n adnabod rhywun a fyddai'n elwa o wiriad Diogelwch yn y Cartref am ddim?

Yn gynharach yr wythnos hon, fe gyflwynodd Gwasanaeth Tân ac Achub Canolbarth a Gorllewin Cymru ymgyrch newydd #DwinNabodRhywun yn Sioe Frenhinol Cymru. Mae'r ymgyrch yn annog teulu a ffrindiau i gadw golwg ar eu cymdogion a'u perthnasau, yn enwedig y rheini a allai fod yn agored i niwed, yn oedrannus neu'n byw ar eu pennau eu hunain.

Bydd yr ymgyrch yn canolbwyntio ar gymunedau gwledig ac yn tynnu sylw at bwysigrwydd cael ymweliad Diogelwch yn y Cartref. Mae'r ymweliadau hyn yn caniatáu i staff Diogelwch Cymunedol wirio ffactorau pwysig yn y cartref, megis cael larymau mwg sy’n gweithio, diogelwch trydanol, llwybrau dianc clir a mwy.

Mae ymweliadau Diogelwch yn y Cartref GTACGC yn cael eu cynnal gan swyddogion hyfforddedig, maent ar gael am ddim a gallent achub bywydau.

Mae’r ystadegau’n dangos bod 58% o’r bobl oedd yn byw yng Nghanolbarth a Gorllewin Cymru a gollodd eu bywydau mewn tanau tai yn y ddwy flynedd ddiwethaf yn byw ar eu pennau eu hunain.

Yn ôl y Rheolwr Gorsaf Rob Tovey:

 

"Yn anffodus, rydyn ni’n aml yn ymateb i danau mewn eiddo y gellid bod wedi'u hosgoi, neu y gellid bod wedi lleihau eu heffaith, trwy fod â gwybodaeth sylfaenol ac offer fel larymau mwg sy’n gweithio. Gallwn gynnig gwiriad diogelwch yn y cartref gan ddarparu'r cyngor a'r offer diogelwch hyn am ddim. Felly, os ydych chi'n meddwl eich bod chi'n adnabod rhywun, siaradwch â nhw a chysylltwch â ni.”



Y ffordd hawsaf o drefnu ymweliad Diogelwch yn y Cartref ar eich cyfer chi neu rywun rydych chi'n ei adnabod yw llenwi ein ffurflen archebu ar-lein: Ymweliad Diogel ac Iach (tancgc.gov.uk) neu ffoniwch ni ar 0800 169 1234.

 #DwinNabodRhywun - ydych chi?


Erthygl Flaenorol Erthygl Nesaf