07.04.2025

Gwasanaeth Tân ac Achub Canolbarth a Gorllewin Cymru i Ymuno â Chonfoi Mwyaf Gwasanaethau Tân ac Achub y DU

Bydd Gwasanaeth Tân ac Achub Canolbarth a Gorllewin Cymru yn ymuno â 17 o Wasanaethau Tân ac Achub eraill o bob cwr o'r DU, a fydd yn danfon offer diffodd tân hanfodol i ddiffoddwyr tân Wcráin, yn lle’r adnoddau hanfodol sydd wedi'u colli yn ystod y gwrthdaro parhaus yn y wlad.

Gan Steffan John



Bydd Gwasanaeth Tân ac Achub Canolbarth a Gorllewin Cymru (GTACGC) yn ymuno â 17 o Wasanaethau Tân ac Achub eraill o bob cwr o'r DU, a fydd yn danfon offer diffodd tân hanfodol i ddiffoddwyr tân Wcráin, yn lle’r adnoddau hanfodol sydd wedi'u colli yn ystod y gwrthdaro parhaus yn y wlad.

Bydd y confoi, sy’n cael ei gydlynu gan FIRE AID a phartneriaid, a’i gefnogi gan Lywodraeth Ei Fawrhydi, yn gadael ym mis Ebrill 2025 a hwn fydd y confoi mwyaf erioed o Wasanaethau Tân ac Achub y DU.

Bydd y confoi yn danfon dros 30 o gerbydau’r Gwasanaeth Tân ac Achub, ac yn cludo dros 15,000 o ddarnau o offer a gyfrannwyd gan wahanol Wasanaethau Tân ac Achub y DU, gan ychwanegu at y 119 o gerbydau a dros 200,000 o ddarnau o offer sydd eisoes wedi’u cyfrannu ers i’r ymosodiad yn Wcráin ddechrau yn 2022.

Bydd yr adnoddau a gyfrannwyd yn rhoi cefnogaeth werthfawr i Ddiffoddwyr Tân Wcráin, sy'n parhau i weithredu yn ardal y rhyfela, i achub bywydau a diogelu eiddo ac i beidio â chymryd rhan yn yr ymladd, a hyn oll yn aml yn peri risg bersonol fawr.  Ers dechrau'r rhyfel, mae 100 o Ddiffoddwyr Tân wedi cael eu lladd a 431 wedi'u hanafu; yn y cyfamser, mae 411 o orsafoedd tân a 1,700 o gerbydau tân wedi'u dinistrio.

Mae Gwasanaethau Tân ac Achub ledled Cymru a Lloegr wedi cyfrannu’r holl beiriannau a chit ar gyfer y confoi, sy’n cynnwys offer diffodd tân sylfaenol fel pibellau, cyfarpar diogelu personol ac offer a chyfarpar gwrthdrawiadau ar y ffordd ymhlith pethau eraill.  Bydd tua 100 o wirfoddolwyr o Wasanaethau Tân ac Achub y DU a FIRE AID yn cymryd rhan yn y confoi.



Wrth siarad am GTACGC yn cymryd rhan yn y confoi i Wcráin, dywedodd y Prif Swyddog Tân Roger Thomas KFSM:

“Mae GTACGC yn falch o fod yn rhan o’r confoi diweddaraf hwn i Wcráin ac i gefnogi cyfrannu a danfon offer diffodd tân hanfodol i’n cydweithwyr yn Wcráin.

Mae’r digwyddiadau yn Wcráin wedi atseinio ar draws cymuned y Gwasanaethau Tân ac Achub ac mae’r confoi hwn yn amlygu ymrwymiad parhaus Gwasanaethau Tân ac Achub y DU i gefnogi Diffoddwyr Tân y wlad.”



Bydd y confoi yn dechrau teithio ar draws Ewrop ym mis Ebrill 2025, cyn cyfrannu’r cyfarpar sydd dros ben ganddynt. Mae pob Gwasanaeth Tân ac Achub wedi rhoi cyfrif am eu hanghenion lleol eu hunain ac wedi blaenoriaethu diogelwch lleol.

Llun o'r confoi i Wcráin ym 2024.


Erthygl Flaenorol Erthygl Nesaf