Ddydd Sul, Ebrill 6ed, cynhaliodd Gwasanaeth Tân ac Achub Canolbarth a Gorllewin Cymru (GTACGC) ei ail Gynhadledd Diffoddwyr Tân Ar Alwad, ym Mhafiliwn yr Aelodau ar Faes Sioe Cymdeithas Amaethyddol Frenhinol Cymru yn Llanfair-ym-Muallt.
Nod y gynhadledd oedd tynnu sylw at y gwaith sy’n cael ei wneud o fewn GTACGC a thu hwnt i wella’r System Dyletswydd Ar Alwad, yn ogystal â rhoi’r wybodaeth ddiweddaraf am fentrau’r Gwasanaeth, megis y Cynllun Rheoli Risg Cymunedol, a thrafod argymhellion a phryderon ynghylch gwella recriwtio a chadw Diffoddwyr Tân Ar Alwad o fewn GTACGC.
Ymhlith y siaradwyr roedd sawl aelod o bersonél GTACGC, gan gynnwys y Prif Swyddog Tân Roger Thomas KFSM, y Prif Swyddog Tân Cynorthwyol Craig Flannery a oedd hefyd yn arwain y digwyddiad, y Rheolwr Grŵp Richard Felton a’r Rheolwr Grŵp Phil Morris, yn ogystal â siaradwyr allanol gan gynnwys Dr Steve Sadler o Re-enkindle a Claire McMinn o Elusen y Diffoddwyr Tân.
Yn ddiweddarach yn y dydd, roedd cyfle i Ddiffoddwyr Tân Ar Alwad y Gwasanaeth ddysgu mwy am yr offer a'r peiriannau arbenigol sydd gan GTACGC o fewn ei fflyd, yn ogystal â sesiwn holi ac ateb gyda siaradwyr y gynhadledd.
Mae'r gwelliannau i recriwtio a chadw Diffoddwyr Tân Ar Alwad a nodwyd a'u gweithredu o fewn GTACGC dros yr ychydig flynyddoedd diwethaf hyd yn hyn wedi cyflawni cynnydd o 2.3% mewn argaeledd ar draws y Gwasanaeth.