Gweithio mewn Partneriaeth er mwyn Diogelu Bywyd Gwyllt a Chefn Gwlad rhag Tanau

“Mae gweithio gydag asiantaethau partner fel Parc Cenedlaethol Bannau Brycheiniog yn hanfodol i leihau effaith tanau sy’n cael eu cynnau’n fwriadol ar draws ardal ein Gwasanaeth. Trwy ddefnyddio gwybodaeth ac arbenigedd Wardeniaid y Parc a'r Tîm Lleihau Tanau Bwriadol, gallwn gynllunio a chreu rhwystrau tân addas a fydd yn y pen draw yn lleihau'r effaith ar y cymunedau yr ydym yn eu gwasanaethu. Rydym yn cydnabod pwysigrwydd rheoli llystyfiant mewn modd cyfrifol trwy ddulliau fel llosgi rhagnodedig ac mae gan GTACGC nifer o ffyrdd y gallwn gynnig cymorth i dirfeddianwyr a rheolwyr fel creu cynllun llosgi a chynllunio rhwystrau tân. Mae’r tymor presennol ar gyfer llosgi rhagnodedig bellach wedi dod i ben a hoffwn atgoffa pawb bod llosgi y tu allan i’r tymor a ganiateir yn anghyfreithlon ac y gellir wynebu cosbau ariannol.”

“Gall tanau sydd wedi eu cynnau’n wael ac sydd heb eu rheoli, tanau gwyllt fel y’u gelwir, arwain at ganlyniadau niweidiol i adar sy’n nythu ar y ddaear, mamaliaid, amffibiaid ac ymlusgiaid bach, ac i’r llystyfiant llawn grug, sydd o bwys rhyngwladol ym Mhrydain. Gall tanau gwyllt hefyd niweidio cynefinoedd sy’n llawn mawn fel gorgorsydd Bannau Brycheiniog, cynefin arall sydd o bwys rhyngwladol, gan ryddhau carbon i’r atmosffer a chyfrannu at yr allyriadau nwyon tŷ gwydr sy’n achosi cynhesu byd-eang. Mae creu rhwystrau tân yn helpu i leihau’r difrod hwn, gan roi amser i ni ymyrryd mewn ffyrdd eraill, er enghraifft trwy losgi dan reolaeth, pori gwartheg a gwaith adfer mawn.”