21.06.2024

Hyfforddiant i Ddefnyddio Dronau mewn Sefyllfaoedd Brys

Mae Gwasanaeth Tân ac Achub Canolbarth a Gorllewin Cymru wedi gwella ei gapasiti o ran dronau yn ddiweddar, trwy hyfforddi saith peilot o bell ychwanegol.

Gan Steffan John



Mae Gwasanaeth Tân ac Achub Canolbarth a Gorllewin Cymru wedi gwella ei gapasiti o ran dronau yn ddiweddar, trwy hyfforddi saith peilot o bell (RP) ychwanegol.

O 10-14 Mehefin, cynhaliwyd cwrs hyfforddiant dronau gan Aviation Systems Group yng Nghanolfan Hyfforddi Chwilio ac Achub Trefol Cymru (USAR) yn Earlswood, gan ymdrin ag ystod eang o bynciau megis deddfau sy'n ymwneud â gweithrediadau dronau, egwyddorion hedfan, gweithdrefnau brys, ffactorau dynol a diogelwch hedfan.

Roedd y cwrs pedwar diwrnod hefyd yn cynnwys asesiad hedfan ymarferol ym Mharc Gwledig Margam yng Nghastell-nedd Port Talbot, lle roedd angen i’r peilotiaid o bell dan hyfforddiant weithredu dronau o fewn golwg, yn ogystal â dangos yr hyn yr oeddent wedi'i ddysgu trwy weithredu gwahanol weithdrefnau hedfan dronau ar gyfer amrywiaeth o efelychiadau o sefyllfaoedd brys.

Mae'r defnydd o ddronau gan y gwasanaethau brys wedi cynyddu'n sylweddol yn ystod y blynyddoedd diwethaf gan eu bod yn medru darparu ymwybyddiaeth sefyllfaol amser real a gwell i ymatebwyr brys wrth ymateb i ddigwyddiadau tân ac achub megis tanau gwyllt, tanau strwythurol masnachol a domestig, digwyddiadau ar ddŵr, chwilio am bobl sydd ar goll, strwythurau wedi cwympo a mwy.





Mae defnyddio dronau mewn digwyddiadau brys yn cynnig nifer o fanteision sylweddol, megis:

  • Gwell diogelwch - gall dronau asesu sefyllfaoedd peryglus o'r awyr, gan leihau'r angen i bersonél y gwasanaethau brys fynd i mewn i amgylcheddau peryglus. Mae hyn yn helpu i leihau'r risg i fywyd dynol yn ystod tanau, cwympiadau strwythurol ac argyfyngau eraill.
  • Gwell Ymwybyddiaeth Sefyllfaol – mae dronau'n darparu gwybodaeth amser real o lawr gwlad sy'n gwella’n sylweddol allu Penaethiaid Digwyddiadau i lunio cynllun i ddelio â digwyddiad.
  • Asesiad Cyflym – mae dronau'n darparu golygfeydd cyflym o'r awyr o leoliadau digwyddiadau, gan ganiatáu gwneud asesiad sefyllfaol a phenderfyniadau, a dyrannu adnoddau, yn gynt.
  • Gwell Hygyrchedd - gall dronau gyrraedd ardaloedd sy'n anodd neu'n amhosibl i bersonél ar y tir gael mynediad iddynt, fel adeiladau uchel neu strwythurau ansefydlog.
  • Delweddu Thermol - gall dronau gyda chamerâu delweddu thermol ganfod ffynonellau gwres, monitro lledaeniad gwres a helpu i ddod o hyd i bobl sydd wedi’u hanafu, yn enwedig mewn dŵr.

Gofynnir yn aml i weithredwyr dronau Tîm USAR Cymru - sy'n cynnwys personél o GTACGC a Gwasanaeth Tân ac Achub De Cymru - gynorthwyo mewn sefyllfaoedd brys. 

Darllenwch fwy am sut y defnyddiwyd technoleg dronau mewn tân gwastraff mawr yn Sir Benfro yn gynnar yn 2024 yma.



Erthygl Flaenorol Erthygl Nesaf