Wythnos Deall Peryglon Dŵr 2025

Bydd Cyngor Cenedlaethol y Penaethiaid Tân yn lansio eu hymgyrch #DeallPeryglonDŵr yr wythnos hon. 

Bydd ymgyrch #DeallPeryglonDŵr Cyngor Cenedlaethol y Penaethiaid Tân yn cael ei chynnal rhwng 28 Ebrill a 4 Mai. Y nod yw codi ymwybyddiaeth o’r perygl o foddi ar ddamwain yn ogystal â rhannu cyngor diogelwch cyn i’r tywydd gynhesu, pan fydd nifer y digwyddiadau hyn yn cynyddu o bosibl. 

Mae Gwasanaeth Tân ac Achub Canolbarth a Gorllewin Cymru yn ymuno yn yr alwad ar bobl i fod yn ddiogel pan fyddant yn y dŵr neu o’i gwmpas. Dyw llawer o bobl ddim yn ymwybodol o beryglon neidio i’r dŵr neu drochi er mwyn oeri, yn enwedig os nad oes ganddynt lawer o brofiad o nofio y tu allan. Gall peryglon anweledig, cerrynt cryf a sioc dŵr oer beri i nofwyr cryf fynd i drafferth, hyd yn oed.

O’r rhai a foddodd ar ddamwain, yn ôl yr ystadegau doedd gan 59% ohonynt ddim math o fwriad mynd i mewn i’r dŵr. Yn aml, llithro, baglu neu gwympo a berodd i’r damweiniau hyn ddigwydd. Boddodd 273 o bobl ar ddamwain yn y DU yn 2023 ac o'r rheini roedd 84% yn ddynion.

Dywedodd y Rheolwr Gorsaf Robert Tovey o Wasanaeth Tân ac Achub Canolbarth a Gorllewin Cymru:

Dyma rai awgrymiadau syml er mwyn helpu i gadw'n ddiogel mewn dŵr ac o’i gwmpas: 

• Os ydych chi'n mynd am dro neu'n rhedeg yn agos i’r dŵr, cadwch at y llwybrau priodol a pheidiwch â mynd at yr ymyl.
• Gwiriwch fod yr amgylchiadau’n ddiogel, a cheisiwch osgoi rhedeg neu gerdded yn agos i ddŵr pan fo’n dywyll, pan fo’n llithrig dan draed neu pan fo’r tywydd yn wael.
• Peidiwch â mynd i'r dŵr ar ôl yfed alcohol.
• Os ydych wedi bod yn yfed, dewiswch lwybr diogel i fynd adref, ewch gyda ffrindiau ac osgowch y dŵr.
• Peidiwch byth â mynd i mewn i'r dŵr er mwyn ceisio helpu person neu anifail - ffoniwch 999 bob amser a defnyddiwch offer achub o ddŵr os oes offer ar gael.
• Os ydych yn treulio amser ger y dŵr, boed hynny gartref neu dramor, gwnewch yn siŵr eich bod yn gyfarwydd â’r wybodaeth leol am ddiogelwch a bod plant yn cael eu goruchwylio trwy’r adeg.

Nid yw llawer o bobl yn disgwyl i'w hamser ger y dŵr droi'n argyfwng, felly gall gwybod beth i’w wneud os ydych chi neu rywun arall yn mynd i drafferth achub bywydau.

Os oes rhywun mewn trafferth yn y dŵr, y ffordd orau i helpu yw cadw’ch pwyll, aros ar dir sych, a chofio Ffonio, Dweud, Taflu:

• Ffoniwch 999 i alw’r gwasanaethau brys.
• Dywedwch wrth y person sydd mewn trafferth arnofio ar eu cefn.
• Taflwch rywbeth sy’n arnofio atynt.

Os byddwch chi mewn trafferth yn y dŵr, cofiwch 'Arnofio i Fyw'. Rhowch eich pen yn ôl gyda’ch clustiau o dan y dŵr. Ymlaciwch, ceisiwch anadlu yn ôl yr arfer. Symudwch eich dwylo i'ch helpu i arnofio. Cadwch eich coesau a’ch breichiau ar led. Pan fyddwch wedi cael rheolaeth ar eich anadl, galwch am gymorth neu nofiwch i rywle diogel.

Am ragor o wybodaeth am yr ymgyrch #DeallPeryglonDŵr ewch i:  www.nfcc.org.uk/bewateraware

I weld negeseuon diogelwch ac i gael gwybodaeth, cyngor neu arweiniad am Ddiogelwch Dŵr, edrychwch ar ein cyfrifon Cyfryngau Cymdeithasol ac ewch i'n gwefan.