16.10.2025

Y Prif Swyddog Tân Roger Thomas yn Cyhoeddi ei Fod yn Ymddeol ar ôl 29 Mlynedd o Wasanaeth Nodedig

Mae Gwasanaeth Tân ac Achub Canolbarth a Gorllewin Cymru yn cyhoeddi heddiw y bydd y Prif Swyddog Tân Roger Thomas KFSM yn ymddeol ar 19 Hydref 2025. Dyma ddiwedd gyrfa ryfeddol 29 mlynedd o hyd wedi’i hymroi i ddiogelwch y cyhoedd a gwasanaeth cymunedol.

Gan Steffan John

Categorïau



Mae Gwasanaeth Tân ac Achub Canolbarth a Gorllewin Cymru yn cyhoeddi heddiw y bydd y Prif Swyddog Tân Roger Thomas KFSM yn ymddeol ar 19 Hydref 2025. Dyma ddiwedd gyrfa ryfeddol 29 mlynedd o hyd wedi’i hymroi i ddiogelwch y cyhoedd a gwasanaeth cymunedol.

Dechreuodd Roger weithio i’r Gwasanaeth fel Diffoddwr Tân ym 1996, ac fe gododd trwy'r rhengoedd i fod yn Brif Swyddog Tân. Bu ei yrfa yn un o broffesiynoldeb, uniondeb ac ymrwymiad diwyro i les y cymunedau yr oedd yn eu gwasanaethu.

Gweithiodd Roger mewn amrywiaeth o swyddi yn ei gyfnod gyda’r Gwasanaeth, a hynny ar yr ochr weithredol ac mewn arweinyddiaeth, gan gynnwys secondiad i Lywodraeth Cymru yn 2007/2008, lle defnyddiodd ei brofiad rheng flaen i helpu i lunio polisïau. Yn 2014, ymunodd â'r Tîm Arweinyddiaeth Weithredol fel Rheolwr Ardal. Yn 2017, daeth yn Rheolwr Brigâd yn ystod cyfnod o drawsnewid sylweddol i'r Gwasanaeth.

Cafodd ei benodi'n Brif Swyddog Tân ym mis Ebrill 2022, ac ers hynny mae Roger wedi arwain gyda rhagoriaeth, cydymdeimlad a gweledigaeth. O dan ei arweinyddiaeth, fe wnaeth y Gwasanaeth gynnal ei safonau uchel o ran rhagoriaeth ar yr ochr weithredol, a hynny gan groesawu arloesedd, cryfhau ymgysylltiad cymunedol a meithrin diwylliant o gynhwysiant a gwytnwch.

Cafodd ei gyfraniad eithriadol gydnabyddiaeth ffurfiol yn Anrhydeddau Pen-blwydd y Brenin 2024, teyrnged briodol i'w ymroddiad gydol oes i'r Gwasanaeth Tân ac Achub.




Ar ei ymddeoliad, dywedodd y Prif Swyddog Tân Roger Thomas KFSM:

“Anrhydedd pennaf fy mywyd fu rhoi fy ngwasanaeth i Wasanaeth Tân ac Achub Canolbarth a Gorllewin Cymru. Rwy'n hynod falch o'r hyn yr ydym wedi'i gyflawni gyda'n gilydd, ac yn ddiolchgar iawn am gefnogaeth fy nghydweithwyr a'n cymunedau.

Rwy’n ymddeol gyda hyder llwyr yn nyfodol y Gwasanaeth a'r bobl anhygoel a fydd yn parhau i'w arwain.”



Dywedodd John Davies, Cadeirydd Awdurdod Tân ac Achub Canolbarth a Gorllewin Cymru:

“Mae etifeddiaeth Roger i’w gweld yn y polisïau a luniodd a’r digwyddiadau a arweiniodd, ond mae hefyd i’w gweld yn y bobl y gwnaeth eu mentora, y timau y gwnaeth eu hysbrydoli, ac yn yr ymddiriedaeth y gwnaeth ei meithrin ar draws y sefydliad a thu hwnt.

Mae'n gadael Gwasanaeth sy'n gryfach ac yn fwy ystwyth o’r herwydd, un sydd â chysylltiad dwfn â'r cymunedau y mae'n eu gwasanaethu. Ar ran yr Awdurdod, dymunaf ymddeoliad hir ac iach i Roger.”



Cyhoeddi Arweinydd Dros Dro

Yn dilyn ymddeoliad y Prif Swyddog Tân Roger Thomas KFSM, mae cyfrifoldebau statudol  Pennaeth y Gwasanaeth â Thâl wedi'u rhoi'n ffurfiol i'r Dirprwy Brif Swyddog Tân, Iwan Cray, a fydd yn gwasanaethu yn y swydd hon dros dro.

Mae'r penodiad dros dro hwn yn sicrhau parhad arweinyddiaeth tra bydd gwaith ar y broses o recriwtio Prif Swyddog Tân / Prif Swyddog Gweithredol parhaol yn digwydd.

Mae gan y Dirprwy Brif Swyddog Tân gyfoeth o brofiad, hanes o arwain, ac ymrwymiad dwfn i werthoedd y Gwasanaeth. Mae penodiad Iwan yn nodi cyfnod o sefydlogrwydd a pharhad, gan alluogi'r sefydliad i gynnal momentwm gyda’i flaenoriaethau strategol, ac i barhau i ddarparu gwasanaethau o ansawdd uchel heb darfu.



Ar ddechrau ei benodiad, dywedodd y Dirprwy Brif Swyddog Tân Iwan Cray:

“Braint yw cael y cyfrifoldeb hwn, ac rwy'n ei dderbyn gydag ymdeimlad o ymrwymiad dwfn i'n pobl, ein cymunedau a'r gwerthoedd sy'n diffinio ein Gwasanaeth.

Er mai trefniant dros dro yw hwn, rwyf am roi sicrwydd i bawb y bydd parhad, sefydlogrwydd a chynnydd yn parhau i fod yn flaenoriaethau.”

Erthygl Flaenorol

Y Newyddion Diweddaraf

GWELD POB NEWYDDION