Ymarferiad Hyfforddi yng Ngweithfeydd Dur TATA Port Talbot

Ddydd Mawrth, 20 Ionawr, cymerodd aelodau criw Gwasanaeth Tân ac Achub Canolbarth a Gorllewin Cymru (GTACGC) ran mewn ymarferiad hyfforddi o'r enw’r "Gweithio ar Uchder", a gynhaliwyd yng Ngweithfeydd Dur TATA, Port Talbot.

Cynlluniwyd yr ymarferiad aml-asiantaethol, a oedd yn cynnwys aelodau criwiau o Orsafoedd Tân Port Talbot, Pontardawe a Threforys, ynghyd â Thîm Ymateb mewn Ardaloedd Peryglus 
Gwasanaeth Ambiwlans Cymru er mwyn gwella gallu'r criw i achub pobl wedi’u hanafu o uchder mawr.

Gweithiodd y tîm gyda'i gilydd i achub dau berson wedi’u hanafu yn llwyddiannus o dŵr 32 metr. Roedd angen ymateb technegol iawn i'r digwyddiad, gyda chriwiau achub â rhaffau y Gwasanaeth Tân yn gweithredu ochr yn ochr â thîm Ymateb mewn Ardaloedd Peryglus 
Gwasanaeth Ambiwlans Cymru. Roedd y senario hefyd yn rhoi cyfle gwerthfawr i TATA Steel brofi a mireinio eu protocolau ar gyfer argyfyngau.

Dywedodd y Rheolwr Gwylfa, Christopher Doyle:

Roedd yr ymarferiad yn llwyddiant ysgubol gyda’r criwiau’n cael gwybodaeth werthfawr mewn lleoliad realistig.

Diolch i TATA Steel am ddarparu'r lleoliad perffaith ar gyfer yr hyfforddiant, i’r Tîm Ymateb mewn Ardaloedd Peryglus ac i'r holl griwiau a gymerodd ran.