Wythnos Diogelwch Tân Trydanol 2026

Mae Cyngor Cenedlaethol y Penaethiaid Tân a Gwasanaeth Tân ac Achub Canolbarth a Gorllewin Cymru (GTACGC) yn annog pobl i gymryd mwy o ofal a lleihau’r risg o danau trydanol yn eu cartrefi y gaeaf hwn.

Oherwydd bod y tywydd yn oerach a chostau byw yn parhau i godi, mae llawer o bobl yn chwilio am ffyrdd amgen o wresogi a phweru eu cartrefi. Wrth i fwy o gartrefi ddibynnu ar wresogyddion trydan, stofiau llosgi coed a dyfeisiau y mae modd eu hailwefru, ni fu atal tân erioed mor bwysig. Er bod arbed arian yn gallu bod yn flaenoriaeth, ni ddylid peryglu diogelwch.

Gall pobl leihau'r risg o danau trydanol yn sylweddol drwy ddilyn y camau allweddol hyn:

• Defnyddiwch yr holl offer yn unol â chyfarwyddiadau'r gwneuthurwyr.
• Cadwch offer yn lân, mewn cyflwr da a'u gwasanaethu'n rheolaidd.
• Peidiwch â phrynu nwyddau trydanol ffug, efallai na fydd y rhain yn bodloni safonau diogelwch.
• Diffoddwch a datgysylltwch offer cyn mynd allan neu fynd i'r gwely (ac eithrio'r rhai sydd wedi'u cynllunio i aros ymlaen, fel oergelloedd a rhewgelloedd).
• Peidiwch â defnyddio peiriannau golchi dillad, peiriannau sychu dillad neu beiriannau golchi llestri dros nos neu pan fyddwch chi allan o'r cartref.
• Gwnewch yn siŵr bod peiriannau sychu dillad wedi'u hawyru'n dda a glanhewch yr hidlydd ar ôl eu defnyddio bob tro.
• Peidiwch â gwefru ffonau neu ddyfeisiau dros nos neu ar ddodrefn meddal.
• Gwiriwch socedi’n rheolaidd; rhowch orau i’w defnyddio ar unwaith os ydyn nhw'n boeth neu'n dangos olion llosgi, a chysylltwch â thrydanwr cofrestredig i archwilio a oes angen eu hatgyweirio neu eu newid.
• Defnyddiwch wresogyddion cludadwy yn ddiogel, cadwch nhw i ffwrdd o ddillad bob amser a pheidiwch byth â'u gadael heb neb i ofalu amdanynt.
• Gwiriwch flancedi trydan o ran traul. Newidiwch unrhyw flancedi dros bum mlwydd oed gan fanwerthwr cymeradwy a'u storio'n ofalus.
• Defnyddiwch geblau estyniad â nifer o socedi yn hytrach nag addaswyr bloc a pheidiwch â gorlwytho (dim mwy na 13 amp/3000 watt). Peidiwch byth â phlygio addaswyr i mewn i addaswyr eraill.

Os ydych chi’n poeni am offer yn eich cartref, defnyddiwch wiriwr cynnyrch ar-lein Electrical Safety First i weld a yw wedi’i adalw.

Cofrestrwch eich offer

Mae preswylwyr yn cael eu hannog i ddefnyddio'r gwasanaeth Cofrestru Fy Offer am ddim, sy'n hysbysu defnyddwyr am atgyweiriadau diogelwch neu adalw cynnyrch. Nid oes angen prawf prynu, gan ei wneud yn addas ar gyfer eitemau ail-law neu anrhegion. Mae cadw offer mewn cyflwr da yn eu helpu i bara'n hirach, yn lleihau costau ac yn cadw cartrefi’n ddiogel.

Dywedodd y Rheolwr Diogelwch Tân yn y Cartref, Gareth Hands:

Diogelwch Batris Ïonau Lithiwm

Mae GTACGC hefyd yn tynnu sylw at y risgiau tân cynyddol sy'n gysylltiedig ag e-feiciau, e-sgwteri a dyfeisiau eraill sy'n cael eu pweru gan fatris ïonau lithiwm Gall y batris hyn fethu yn drychinebus os ydynt wedi'u difrodi, eu gorwefru neu eu gwefru gan ddefnyddio offer anghydnaws. Gall hyn arwain at danau sy'n lledaenu'n gyflym sy'n cynhyrchu mwg gwenwynig.

Mae tanau batris ïonau lithiwm yn datblygu'n gyflym a gallant fod yn anodd iawn eu diffodd, gan wneud atal yn hanfodol. Er mwyn eich helpu chi a'ch teuluoedd i gadw'n ddiogel ac i leihau'r risg o dân yn eich cartref gan fatris ïonau lithiwm, dilynwch ein cyngor diogelwch isod:

• Prynwch e-feiciau, e-sgwteri a gwefrwyr gan fanwerthwyr ag enw da yn unig.
• Defnyddiwch y gwefrydd cywir a gyflenwir gyda'r ddyfais, peidiwch byth â defnyddio gwefrwyr sy’n addas ar gyfer offer eraill..
• Gwefrwch fatris ar wyneb caled, gwastad i ffwrdd o allanfeydd a llwybrau dianc.
• Peidiwch byth â gwefru batris wrth gysgu neu pan fyddwch chi allan o'r cartref.
• Dylech roi’r gorau i ddefnyddio batris sy'n dangos arwyddion o ddifrod, chwyddo, gorboethi neu sy’n arogli’n anarferol.
• Peidiwch ag addasu neu ymyrryd â phecynnau batris neu fotorau.
• Cadwch e-feiciau ac e-sgwteri i ffwrdd o ardaloedd cymunedol, coridorau neu risiau.
• Os caiff batri ei ollwng, ei ddifrodi neu ei fod mewn gwrthdrawiad, gofynnwch i dechnegydd cymwys ei archwilio.

Dywedodd y Rheolwr Diogelwch Cymunedol, Aled Griffiths:

Am fwy o wybodaeth am sut i ailgylchu batris yn gywir, ewch i'r wefan Recycle Your Electricals ac i ddod o hyd i'ch cyfleuster ailgylchu agosaf, ewch i wefan Cymru yn Ailgylchu.

Gallwch gynnal gwiriad diogelwch tân yn y cartref ar ein gwefan gan ddefnyddio Safelincs - gwiriwr Diogelwch Tân yn y Cartref ar-lein. Bydd yn eich tywys chi o gwmpas eich cartref un ystafell ar y tro a bydd y cwestiynau syml yn eich helpu i ddod o hyd i risgiau tân wrth i chi fynd o gwmpas eich cartref.

Mae GTACGC hefyd yn cynnig ymweliadau Diogel ac Iach lle gall y tîm Diogelwch Cymunedol roi cyngor naill ai dros y ffôn neu ymweld â'ch eiddo i roi cefnogaeth ar ddiogelwch yn y cartref. Gallwch drefnu eich ymweliad trwy ffonio 0800 169 1234 neu drefnu ar-lein ar Ymweliad Diogel ac Iach - Gwasanaeth Tân ac Achub Canolbarth a Gorllewin Cymru (https://www.mawwfire.gov.uk/cym/)