Y Tad a’r Mab: Tri Theulu o Ddiffoddwyr Tân yn Gwasanaethu Gyda'i Gilydd yng Ngorsaf Dân Llandrindod

O'r chwith i'r dde: Connor a Paul Treacy, Fin a Mark 'Dom' Hughes, a Richard a Brad Phillips.

Gyda'i gilydd, mae Paul a Connor Treacy, Mark 'Dom' a Fin Hughes, a Richard a Brad Phillips wedi ymroi mwy na 73 mlynedd o wasanaeth i ddiogelu eu cymunedau, gan ddangos y traddodiadau teuluol cryf a'r ysbryd cymunedol sy'n parhau i ffynnu o fewn y Gwasanaeth Tân ac Achub.

Mae’r ymrwymiad maent yn ei rannu i wasanaeth cyhoeddus yn dangos y cysylltiadau teuluol cryf a'r ysbryd cymunedol sy'n parhau i chwarae rhan bwysig yng GTACGC.  Ar un achlysur cofiadwy, ymatebodd y chwech i ddigwyddiad gyda'i gilydd ar fwrdd yr un injan dân.

Paul a Connor Treacy

Ymunodd y Rheolwr Criw Paul Treacy â GTACGC ar ôl cael ei annog i wneud cais gan gydweithiwr.  Ers hynny, mae wedi gwasanaethu cymuned Llandrindod a'r ardal gyfagos am fwy na 16 mlynedd, gan gael ei alw i ystod eang o ddigwyddiadau a chefnogi ymateb y Gwasanaeth i argyfyngau lleol.

Ymunodd y Diffoddwr Tân Connor Treacy â'r Gwasanaeth ychydig dros flwyddyn yn ôl, ar ôl datblygu diddordeb yn y Gwasanaeth Tân ac Achub o oedran ifanc.  Roedd cael ei fagu o amgylch Gorsaf Dân Llandrindod a gweld ei dad yn cyflawni ei ddyletswyddau fel Diffoddwr Tân Ar Alwad yn rhoi cipolwg gwerthfawr iddo o'r rôl a'r ymrwymiad sydd ei angen.

I Paul a Connor, un o'r agweddau mwyaf gwerth chweil o fod yn Ddiffoddwr Tân Ar Alwad yw'r cyfle i wasanaethu a diogelu'r cymunedau y maent yn byw ac yn gweithio ynddynt.

Mark 'Dom' a Fin Hughes

Fel yr un sydd wedi gwasanaethu hiraf o’r tri thad, mae’r Rheolwr Criw Mark ‘Dom’ Hughes wedi rhoi mwy na 26 mlynedd i Orsaf Dân Llandrindod.  Mae'r hyn a ddechreuodd fel cyfle am her, cyfeillgarwch ac incwm ychwanegol wedi tyfu i fod yn ymrwymiad parhaol i wasanaethu cymuned Llandrindod ochr yn ochr â chriw ymroddedig.

Wedi'i ysbrydoli gan ymrwymiad ei dad, ymunodd mab Dom, y Diffoddwr Tân Fin Hughes, â chriw Llandrindod dair blynedd yn ôl.  Fel Dom, cafodd ei ddenu at y cyfeillgarwch o fod yn rhan o'i Orsaf Dân leol, yn ogystal â'r cyfle i ddatblygu sgiliau newydd ac, fel y mae'n cellwair, i ychwanegu rhywbeth diddorol at ei broffil detio ar-lein!

Richard a Brad Phillips

Mae'r Diffoddwr Tân Richard Phillips wedi gwasanaethu cymuned Llandrindod ers dros 24 mlynedd, wedi'i ysgogi gan awydd i ymgymryd â rôl a oedd yn heriol ac yn werth chweil.  I Richard, mae'r cyfle i wasanaethu a chefnogi ei gymuned leol yn parhau i fod yn un o'r rhannau pwysicaf o fod yn Ddiffoddwr Tân Ar Alwad.

Ymunodd mab Richard, y Diffoddwr Tân Brad Phillips, â chriw Llandrindod dair blynedd yn ôl ac ers hynny mae wedi defnyddio'r sgiliau a'r profiad a gafodd fel Diffoddwr Tân Ar Alwad i symud ymlaen i rôl Diffoddwr Tân Amser Cyflawn gyda Gwasanaeth Tân ac Achub De Cymru yng Ngorsaf Dân Glynebwy.  I Brad, mae'r rhannau mwyaf gwerth chweil o'r rôl yn cynnwys bod yn aelod uchel ei barch o'r gymuned a gweld y rhyddhad a'r gwerthfawrogiad y mae pobl yn ei ddangos pan fydd y criw yn cyrraedd digwyddiad.

Mae cysylltiad y teulu â Gorsaf Dân Llandrindod yn ymestyn hyd yn oed ymhellach, gyda merch Richard hefyd wedi gwasanaethu fel Diffoddwr Tân yn y gorffennol.

Mae straeon y teuluoedd Treacy, Hughes a Phillips yn tynnu sylw at y rôl unigryw y mae cysylltiadau teuluol, ymrwymiad ac ysbryd cymunedol yn ei chwarae o fewn y Gwasanaeth Tân ac Achub.

Wrth feddwl beth fyddai’r cyngor y byddent yn ei roi i unrhyw un sy'n ystyried dod yn Ddiffoddwr Tân Ar Alwad, gan ystyried eu blynyddoedd o wasanaeth gyda’i gilydd, roedd gan y chwech neges gyffredin: gweithio'n galed, parhau’n ymrwymedig a gwneud y gorau o bob cyfle.  Cytunwyd bod y rôl yn cynnig profiadau amhrisiadwy a bod y gwobrau o wasanaethu'r gymuned yn un mor fawr â'r ymdrech a fuddsoddwyd yn y rôl.

Mae presenoldeb tri theulu o Ddiffoddwyr Tân sy’n dad a mab yng Ngorsaf Dân Llandrindod yn adlewyrchiad pwerus o'r ymroddiad, y balchder a'r ymdeimlad o ddyletswydd sy'n sail i rôl Diffoddwyr Tân Ar Alwad a GTACGC.

Wrth siarad am eu hymroddiad, dywedodd Rheolwr yr Orsaf, Sam Harries:

"Mae'n arbennig iawn cael tri thad yn gwasanaethu ochr yn ochr â'u meibion yma yng Ngorsaf Dân Llandrindod, ac mae'n adlewyrchiad gwych o'r ysbryd a'r ymrwymiad cymunedol cryf sy'n bodoli o fewn ein criw.

Mae’r teuluoedd Treacy, Hughes a Phillips wedi gwneud cyfraniad eithriadol i'r orsaf, ac rydym yn hynod falch o'r gwasanaeth maen nhw'n parhau i'w roi wrth gefnogi eu cymunedau lleol."

30 Mlynedd o GTACGC

Ers ei ffurfio yn 1996, mae GTACGC wedi tyfu i fod yn un o sefydliadau tân ac achub mwyaf y DU, gan wasanaethu tirwedd eang ac amrywiol, o bentrefi gwledig a threfi arfordirol i ddinasoedd trefol prysur.

Trwy gydol y cyfnod hwn, mae ein timau wedi ymateb i filoedd o argyfyngau, wedi bod yn hybu diogelwch a chamau atal tân ac wedi addasu'n barhaus i heriau newydd gyda phroffesiynoldeb a gwydnwch.