Digwyddiad Diogelwch ar y Ffyrdd y 5 Angheuol yng Ngorsaf Dân y Drenewydd

Yn dilyn sawl gwrthdrawiad sylweddol ar ffyrdd Powys ac i dynnu sylw at ymgyrch ymwybyddiaeth diogelwch ar y ffyrdd barhaus Gwasanaeth Tân ac Achub Canolbarth a Gorllewin Cymru (GTACGC), cynhaliwyd arddangosiad gwrthdrawiad ar y ffordd yng Ngorsaf Dân y Drenewydd ddydd Sadwrn, 16 Mai.

Roedd yr ymarfer yn efelychu gwrthdrawiad difrifol ar y ffordd yn cynnwys sawl cerbyd a sawl person wedi’u hanafu, gan roi cyfle i sawl asiantaeth, gan gynnwys Heddlu Dyfed-Powys ac Ymddiriedolaeth GIG Gwasanaethau Ambiwlans Cymru, gydweithio a chryfhau eu hymateb i ddigwyddiadau brys ar raddfa fawr.

Cymerodd cyfarpar tân a chriwiau o Orsafoedd Tân GTACGC o bob rhan o Bowys ran, gan ymarfer technegau ar gyfer tynnu pobl yn rhydd, gofalau am bobl oedd wedi’u hanafu a chydlynu rheolaeth y digwyddiad.  Daeth chwaraewyr rôl a oedd yn actio fel pobl wedi’u hanafu â realaeth i'r ymarfer hyfforddi, gyda chyfranogwyr yn datblygu eu sgiliau i flaenoriaethu gofalu am bobl wedi’u hanafu.

Yn dilyn yr arddangosiad byw o’r gwrthdrawiad, roedd y mynychwyr yn gallu cwrdd â'u Diffoddwyr Tân lleol, Swyddogion yr Heddlu, Parafeddygon a chynrychiolwyr o Uned Diogelwch Ffyrdd Cyngor Sir Powys. 

Roedd cyfle hefyd i fynychwyr gymryd rhan mewn arddangosiadau CPR a chymorth cyntaf sylfaenol, gan helpu i godi ymwybyddiaeth o sgiliau achub bywydau a'r camau y gall aelodau o'r cyhoedd eu cymryd mewn argyfwng cyn i'r gwasanaethau brys gyrraedd.

Dywedodd Pennaeth Rhanbarth y Gogledd, GTACGC, y Rheolwr Grŵp Phil Morris:

"Mae ymarferion fel hyn yn hanfodol i'n helpu i gynnal gweithlu diogel, cymwys ac effeithiol.  Maen nhw’n rhoi cyfle i ni hyfforddi mewn amodau realistig, cryfhau ein gallu i gydweithio ag asiantaethau partner a sicrhau ein bod yn gwbl barod i ymateb pan fydd digwyddiadau go iawn yn digwydd.

Trwy ail-greu pwysau a natur anrhagweladwy argyfyngau gwirioneddol, rydyn ni’n gallu profi ein penderfyniadau, mireinio ein technegau gweithredol a nodi unrhyw feysydd lle gallwn wella.  Mae'r senarios hyn hefyd yn caniatáu i'n criwiau fagu hyder yn eu hoffer, eu hyfforddiant ac, yn bwysicaf oll, yn ei gilydd.

Mae ymarferion ar y cyd fel hyn yn ein helpu i ddeall rolau ein gilydd, symleiddio cyfathrebu a sicrhau y gallwn ymateb yn gyflym, yn effeithlon ac yn unedig pan fydd y cyhoedd ein hangen fwyaf."

Dywedodd y Rhingyll Andrew Buckley, o Orsaf Heddlu'r Drenewydd:

"Roedd yr arddangosiad gwrthdrawiad ar y ffordd hwn yn gyfle gwych i ni weithio gyda'n partneriaid golau glas, GTACGC a Gwasanaeth Ambiwlans Cymru ar bob mater yn ymwneud â diogelwch ar y ffyrdd.

Er ein bod yn gweithio'n agos gyda'n partneriaid golau glas yn dilyn gwrthdrawiadau ar y ffyrdd, roedd y digwyddiad hwn yn caniatáu i ni ddefnyddio'r un gwaith tîm i wneud popeth y gallwn i atal y digwyddiadau hynny rhag digwydd yn y lle cyntaf.

Diolch i'n cydweithwyr yn GTACGC am ein croesawu yng Ngorsaf Dân y Drenewydd am y fenter wych hon ar y cyd a diolch i'r holl fynychwyr a stopiodd i siarad â ni."

Diogelwch ar y Ffyrdd

Mae Gwasanaeth Tân ac Achub Canolbarth a Gorllewin Cymru yn gweithio ar y cyd â nifer o sefydliadau a thrwy amrywiaeth o fentrau i ddiogelu defnyddwyr ffyrdd, gan gynnwys gyrwyr ceir, beicwyr modur a cherddwyr ledled ein hardal gwasanaeth.

Darganfyddwch fwy am ein mentrau diogelwch ar y ffyrdd yma.